Ég fékk í gær bréf frá borgaryfirvöldunum hér í bæ. Þau vildu undirbúa mig fyrir kosningarnar sem eru í nánd. Það er að segja kosningarnar í Írak. Þar sem að mikil spenna er í kringum kosningarnar þá verður ströng öryggisgæsla við alla kjörstaði. Það er því mikilvægt að ég sé vel upplýstur um þau öryggisatriði sem mig snerta.

Hingað til hafði ég talið mig búa í nægilegri fjarlægð frá Írak til að ég væri nokkurn veginn úr skotlínu. Það vill hins vegar svo til að ég bý í næsta húsi við kjörstað. Utankjörfundarkjörstað.

Ballið byrjar á morgun með skráningu kjósenda. Skráningin heldur svo áfram fram að kosningum. Öllu klabbinu lýkur svo í lok mánaðarins.

Næstu tvær vikurnar verður því öll bílaumferð bönnuð um nágrennið. Einnig verð ég að vera á varðbergi og láta lögregluna vita ef einhver biður um afnot af íbúðinni minni.