Nú ganga heilmiklar vetrarhörkur yfir Holland. Það kynngir niður snjó. Það fer nú kannski ekki mikið fyrir snjónum í Amsterdam miðri. Hins vegar eru snjóþyngsli heldur meiri inn til sveita.  Ég þurfti að hjóla í gegnum allt að fimmtíu millimetra jafnfallinn snjó á leiðinni í vinnuna í morgun.

Eins og venja er í þvílíku fannfergi þá fór umferð öll úr skorðum í morgun. Þegar mest var mældist lengd biðraða á hraðbrautum landsins fimmhundruðogsextíu kílómetrar. Fróðir menn segja að það sé fimmta lengsta biðraðasúpa í sögu þjóðarinnar.

Það er ekki hægt að segja annað en að vetrarveðrið hafi lagst vel í mig. Ég vaknaði fyrir allar aldir, mætti snemma í vinnuna og kom heilmiklu í verk. Það er þó ekki víst að allir hafi verið jafn hressir í dag.  Það telst nefnilega vísindalega sannað að tuttugastiogfjórði janúar sé sá dagur ársins sem fólki er hættast við þunglyndi.