Í dag var heldur meiri dugur í vorhretinu sem hefur legið yfir borginni síðustu daga. Um tíma var á gangstéttum allt að 5mm jafnfallinn snjór. Eftir að hafa eytt lunga dagsins í lærdóm byrjaði ég á endurhönnun heimasíðunnar minnar. Vonandi mun breytt heimasíða birtast umheiminum skömmu eftir næstu mánaðamót.
Nú þegar átök hafa blossað upp að nýju á Balkanskaga birtast óhugnanlegar fréttir á cnn. Myndir af hermönnum að störfum. Eldar brenna og skilja eftir sig sviðna jörð. Stjórnin hefur sagt óvininum stríð á hendur. Saklausum er slátrað fyrir það eitt að vera af sama sauðahúsi og óvinurinn. Fréttirnar eru frá Bretlandi þar sem herinn berst nú við útbreiðslu gin og klaufaveiki. Sjálfur er ég orðinn frekar þreyttur á þessum fréttum. En öðrum vil ég benda á www.cnn.com/footandmouth.
Þegar ég vaknaði í morgun var mér litið út um gluggann. Ég hugsaði með mér hversu mikið ég hlakkaði til að fara út í sólskinið. Þegar ég hafði klætt mig í sokkana og burstað tennurnar var mér aftur litið út um gluggann. Ég hugsaði með mér hversu mikið ég kveið fyrir að þurfa að fara út í snjóbylinn (snjór í vindi). Eftir að hafa ætt í gegnum snjóstorminn (raunar nær því að vera snjóstinnigsgola) tókst mér að komast á skrifstofuna….
Vaknaði um hálfáttaleytið, hitaði kaffi og eldaði grjónagraut. Klukkan átta settist ég svo fyrir framan sjónvarpið til að horfa á beina útsendingu frá Malasíukappakstrinum. Hollensku þulirnir voru afar kátir því að hollenska ökumanninum Jos Verstappen gekk allt í haginn. Því miður náði hann ekki að næla sér í stig en stóð sig samt vel. Ég kíkti á nokkrar vefsíður um Alpagöngur. Á einni þeirra var verið að kynna ævintýraferðir í Ölpunum. Mér leist vel á síðuna þar til farið var…
Líkt og með gærdaginn ákvað ég að eyða deginum í lestur. Ég las skáldsöguna Sjö bræður eftir finnska rithöfundinn Aleksis Kivi. Sagan segir frá lífi sjö bræðra í Finnlandi. Ég gaf mér þó tíma til að líta upp úr bókinni til sjá sýnt frá tímatöku fyrir Malasíukappaksturinn.
Þar sem ég var kvefaður og úti var rigning þá ákavað ég tileinka þennan dag lestri. Ég las skáldsöguna Fáfræðina eftir Milan Kundera. Bókin fjallar um tvo Tékka sem snúa til baka til Bæheims eftir tuttugu ára fjarveru. Mér finnst eins og það sé stanslaus rigning í þessarri borg. Ég minntist þess ekki að það rigndi nærri því eins mikið í Reykjavík. Við nánari athugun kom í ljós að ársúrkoma er tvöfalt meiri í Reykjavík en í Amsterdam.
Það að sjóða egg er oft talin lágmarkskunnátta í matseld. Þegar ætlaði að sjóða egg til að setja í túnfisksalatið mitt áttaði ég mig á að ég hafði aldrei á ævinni soðið egg í potti. Ég hafði alltaf notað hátækni eggjasjóðarann sem var til heima á Íslandi. Ég hafði þó grun um að suða eggja fælist í að láta þau liggja í sjóðandi vatni í ákveðinn tíma. Það hugboð mitt reyndist rétt því sú aðferð dugði. Ég fékk því egg…
Ég skrapp með Makedónskum nágranna mínum í mötuneyti háskólans til að komast að því hvernig ódýrt stúdentafæði bragðaðist. Þetta var nú ekki svo slæmur matur en fékk mig samt til að sannfærast enn frekar um ágæti minnar eigin matseldar. Yfir matnum bárum við saman hagkerfi Ísland og Makedóníu. Einnig fræddi hann mig um ástandið á Balkanskaga eins og það lítur út frá sjónarhóli Makedóna.
Námsráðgjafinn minn, sem jafnframt kennir mér Semantics of Computation, var búinn að segjast ætla að lána mér bók um lamda calculus. Ég vildi nefnilega glöggva mig betur á efninu áður en ég gerði heimadæmin mín. Þegar ég mætti á skrifstofuna hans í morgun til að sækja bókina var komið annað hljóð í skrokkinn. Hann hafði áttað sig á að lausn á hluta heimadæmanna var gefin í bókinni. Þar af leiðandi vildi hann ekki lána mér bókina en benti mér á…
Ég vaknaði klukkan 7:50 við að það var bankað á dyrnar hjá mér. Ég staulaðist fram úr og opnaði dyrnar. Fyrir utan stóð nágranni minn skömmustulegur og sagði: "Fyrirgefðu en ég hélt þú værir vaknaður. En gætirðu litið í heimsókn til mín áður en þú ferð í skólann og kennt mér að klippa og líma (cut and paste)." Ég sagði það vera sjálfsagt og fór aftur að sofa og svaf vært þar til vekjaraklukkan mín hringdi. Klukkan 8:00 hringdi vekjaraklukkan….